साउदीमा नेपाली कामदारले एयरपोर्ट पुग्नासाथ पाउनेछन् सुबिधा

चैत ३, काठमाडौं । कामका लागि साउदी अरेबिया जाने सबै बिदेशी कामदारहरुलाई साउदी अरेबियाको सरकारले एयरपोर्टमै स्वागत गरि विभिन्न सेवा र परामर्श दिने भएको छ ।

साउदी सरकारले बिदेशी कामदारहरुलाई साउदी टेलिकम कम्पनी (एसटीसी)ले निःशुल्क सिमकार्ड दिनेछ । उक्त सिमकार्डमा केहि मिनेटको फ्रि टकटाइम र एसएमएस सेवा पनि हुनेछ । जसबाट कामदारले विदेश आइपुग्नासाथ आफ्नो परिवारलाई सम्पर्क गर्न सक्ने भएका छन् ।

त्यहाँको अध्यागमन विभागको नेतृत्वमा सुरु भएको यो कार्यक्रमको साउदीका श्रममन्त्री मुफ्रीज अल हक्बानीले मंगलबार उदघाटन गरेका छन् । रियादको किंग केल्हाद अन्तर्राष्ट्रिय विमानस्थलमा रहेको सरकारी हेल्पडेस्क उदघाटन गरेर उनले यस कार्यक्रमको औपचारिक सुरुवात गरे । अर्को हप्तादेखि अन्य अन्तर्राष्ट्रिय विमानस्थल र अध्यागमन बिन्दुमा पनि यस्तै कामको सुरुवात गर्ने मन्त्रालयको तयारी छ ।

यो सेवाबाट अब कामदार विमानस्थलमै अलपत्र परेर दुःख पाएको देख्न र सुन्न नपर्ने अपेक्षा गरिएको छ । मोबाइलको सिमकार्डसँगै कामदारले आफ्ना अधिकार, काम, कर्तब्य, देशको कानुन, समस्या परे साउदी सरकारसँग सहयोग माग्ने निकाय र त्यसका प्रक्रियालगायतका विषय समेटिएको ब्रोसर पाउनेछन् । ब्रोसर कामदारकै आफ्नै भाषामा तयार गरिएको हुने अरबन्युज डटकमले जनाएको छ ।